Ovulyasiyanın stimulyasiyası və izlənməsi

Ovulyasiya nədir? (ümumi məlumat)

Ovulyasiya — yetişmiş follikulun partlaması və yumurta hüceyrəsinin xaric olmasıdır. Yumurta hüceyrəsi uşaqlıq borusuna keçir və mayalanma burada baş verir. Ovulyasiya vaxtını bilmək vacibdir, çünki hamilə qalma ehtimalı bu dövrdə artır.

Kimə lazım ola bilər?

• Polikistoz yumurtalıq sindromunda
• Nizamsız və ya çox seyrək aybaşıda
• Səbəbi açıqlanmayan sonsuzluqda — aşılama ilə birlikdə

Stimulyasiyaya başlamazdan əvvəl prolaktin, qalxanabənzər vəzi hormonları və çəki kimi düzəldilə bilən səbəblər yoxlanılır.

Necə aparılır?

1. Tsiklin əvvəlində tablet və ya iynə şəklində preparat təyin olunur — seçim yaşa, diaqnoza və əvvəlki cavaba görə həkim tərəfindən edilir. Polikistoz yumurtalıq sindromunda beynəlxalq tövsiyələr ilk sırada letrozolu göstərir.
2. Follikulun böyüməsi bir neçə dəfə ultrasəs ilə izlənir.
3. Follikul lazımi ölçüyə çatdıqda ovulyasiya vaxtı müəyyənləşdirilir; cinsi əlaqənin vaxtı və ya aşılama planlanır.

Risklər və təhlükəsizlik

• Çoxlu follikul yetişdikdə çoxdöllü hamiləlik riski — buna görə ultrasəs nəzarəti vacibdir
• Nadir hallarda yumurtalıqların hiperstimulyasiyası
• Stimulyasiya preparatlarını həkim nəzarəti olmadan qəbul etmək təhlükəlidir